CSI Madhya Kerala Diocese

കർത്താവിൽ പ്രിയരേ,

ക്രിസ്തുയേശുവിന്റെ നാമത്തിൽ ഏവർക്കും സ്‌നേഹവന്ദനം!

സന്തോഷകരവും അനുഗ്രഹപ്രദവുമായ പുതുവർഷം ഏവർക്കും ആശംസിക്കുന്നു. 2024 മഹായിടവകയായി പുതുക്കത്തിന്റെ വർഷം (Year of Renewal) ആയി വേർതിരിച്ചിരിക്കുന്നു. പിന്നിടുന്ന വർഷം നാം പ്രഘോ ഷണത്തിന്റെ വർഷമായിട്ടാണല്ലോ ക്രമീകരിച്ചത്. ദിനംതോറുമുള്ള പ്രഘോ ഷണം നമ്മെ പുതുക്കത്തിന്റെ അനുഭവത്തിലേക്കു നയിക്കുന്നു എന്ന ചിന്തയിലാണ് ഈ വർഷം പുതുക്കത്തിന്റെ വർഷമായി തിരഞ്ഞെടുത്തിരിക്കുന്നത്. ക്രിസ്തുവിൽ ഒരു പുതുസൃഷ്ടിയായിത്തീരുന്നതിനു നമ്മിൽ സന്നദ്ധതയും ഒരുക്കവും സമർപ്പണവും ആവശ്യമാണ്. പുതുക്കത്തിന്റെ അനുഭവം ശരീരത്തിലും മനസ്സിലും ആത്മാവിലും കാത്തുസൂക്ഷിക്കുവാൻ ദൈവം തന്റെ പരിശുദ്ധാത്മാവ് മുഖാന്തരം നമ്മെ സഹായിക്കേണ്ടതിനായി പ്രാർത്ഥിക്കുന്നു. അപ്പൊസ്തലനായ പൗലൊസ് തന്റെ ലേഖനങ്ങളിൽ പ്രതിപാദിക്കു ന്ന ഒരു ദർശനമാണ് 'ക്രിസ്തുവിൽ' (In Christ) എന്നത്. ദൈനംദിന ജീവിതത്തിൽ യേശുവുമായുള്ള ആഴമേറിയ ബന്ധത്തെ കുറിക്കുന്നതിനാണ് ഈ വാക്ക് ഉപയോഗിച്ചിരിക്കുന്നത്. പൗലൊസ് അപ്പൊസ്തലൻ ഈ ബന്ധത്തെ വിശദീകരിക്കുന്നത് ഇപ്രകാരമാണ്: ''ഒരുത്തൻ ക്രിസ്തുവിൽ ആയാൽ അവൻ പുതിയ സൃഷ്ടിയാകുന്നു'' (2 കൊരിന്ത്യർ 5:17). അപ്പൊസ്തലനെ സംബന്ധിച്ചിടത്തോളം യേശുവുമായുള്ള ബന്ധത്തെ സൂചിപ്പിക്കുന്നതിനുള്ള ഒരു പദം മാത്രമല്ലായിരുന്നു; ക്രിസ്തുവുമായുള്ള ദൈനംദിന ജീവിതബന്ധത്തെ വെളിപ്പെടുത്തുന്ന ഒരു അനുഭവം കൂടിയായിരുന്നു 'ക്രിസ്തു വിൽ' എന്നത്. എഫെസ്യ ലേഖനത്തിൽ പൗലൊസ് അപ്പൊസ്തലൻ സമാനമായ ഒരു ആശയം കൂടി മുമ്പോട്ടു വയ്ക്കുന്നുണ്ട്.' 'നിങ്ങളിൽ ഉള്ള പഴയ മനുഷ്യനെ ഉപേക്ഷിച്ചു ദൈവാനുരൂപമായി സൃഷ്ടിക്കപ്പെട്ട പുതുമനുഷ്യനെ ധരിച്ചുകൊൾവിൻ' (എഫെസ്യർ 4:24). ദിനംതോറുമുള്ള ജീവിതത്തിൽ ക്രിസ്തുവുമായുള്ള ബന്ധത്തിൽകൂടി ഒരു പുതിയ സൃഷ്ടിയായിത്തീരുന്നതിന്റെ സാധ്യത അപ്പൊസ്തലൻ വിവരിക്കുന്നതിനൊപ്പം നമ്മെ നവീകരിക്കേണ്ടതിന്റെ അനിവാര്യതകൂടി ഇവിടെ ഓർമ്മപ്പെടുത്തുന്നു. കാലാകാലങ്ങളിലായി നമ്മുടെ സ്വത്വത്തിൽ അടിഞ്ഞുകൂടിയതായ മലിനതകളെ ഒരു ആഭരണമായി സ്വീകരിക്കാതെ അതിനെ ഉരിഞ്ഞുകളയു വാനും, ക്രിസ്തുവിനെ ധരിച്ചു പുതുമനുഷ്യനായിത്തീരുവാനുള്ള ആഹ്വാനമാണ് അപ്പൊസ്തലൻ നൽകുന്നത്. പൗലൊസ് അപ്പൊസ്തലന്റെ ഈ വാക്കുകൾ ജീവിതത്തെ സ്വയംശോധന ചെയ്യുന്നതിനുള്ള ഒരു ആഹ്വാനമായി നാം സ്വീകരിക്കേണ്ടതാണ്. ക്രിസ്തുവിൽ വീണ്ടെടുക്കപ്പെട്ട പുതുസൃഷ്ടികളാണ് നാം ഓരോരു ത്തരും. എന്നാൽ ഈ ലോകജീവിതത്തിൽ നമ്മിൽ അലിഞ്ഞു ചേർന്നിരിക്കുന്ന അനീതിയുടെയും അസത്യത്തിന്റെയും അധാർമികതയുടെയും മേലാടകളെ തിരിച്ചറിഞ്ഞ് ഉപേക്ഷിക്കുവാനുള്ള ഒരു ബോധപൂർവമായ പരിശ്രമമാണ് ഒരുവനെ ക്രിസ്തുവിൽ പുതുസൃഷ്ടിയായി നിലനിർത്തുന്നതിനുള്ള ആദ്യപടി. യോഹന്നാൻ സമാനമായി ശാക്തീകരണം നൽകിക്കൊണ്ട് പറയുന്നു: ''എന്നിൽ വസിപ്പിൻ; ഞാൻ നിങ്ങളിലും വസിക്കും; ഒരുത്തൻ എന്നിലും ഞാൻ അവനിലും വസിക്കുന്നു എങ്കിൽ അവൻ വളരെ ഫലം കായിക്കും' (യോഹന്നാൻ 15:4). ഇതൊരു പ്രഖ്യാപനം മാത്രമല്ല, ഫലകരമായ ജീവിതം നയിക്കുന്നതിനുള്ള ക്ഷണംകൂടിയാണ്. ഒരുവൻ ക്രിസ്തുവിലും ക്രിസ്തു അവനിലും വസിക്കുന്ന പരസ്പരപൂരകമായ ബന്ധത്തിന്റെ വിവരണമാണ് യേശുവിന്റെ വാക്കുകളിൽ കാണുവാൻ കഴിയുന്നത്. എന്നാൽ ഒരു കാര്യം ഇവിടെ ശ്രദ്ധേയമാണ്. യേശുവിനായി തങ്ങളുടെ ഹൃദയവാതിലുകളെ തുറന്നിടുന്നവർക്കു മാത്രമേ ക്രിസ്തുവിൽ പുതിയ സൃഷ്ടിയായിത്തീരുന്ന അനുഭവത്തിലേക്കു പ്രവേശിക്കുവാൻ സാധിക്കുകയുള്ളൂ. ദൈവം സർവശക്തൻ എങ്കിലും മനുഷ്യ സ്വാതന്ത്ര്യത്തെ ദൈവം മാനിക്കുന്നു. അനുവാദം ചോദിക്കാതെ ദൈവം ആരുടെയും ജീവിതത്തിലേക്ക് ബലമായി കടന്നുവരുന്നില്ല എന്നതാണ് വാസ്തവം. ക്രിസ്തുവിൽ ഒരു പുതിയ സൃഷ്ടിയായി രൂപാന്തരം പ്രാപിക്കുന്ന വ്യക്തിക്ക് താൻ ജീവിക്കുന്ന ചുറ്റുപാടുകളെയും സ്വാധീനിക്കുവാൻ സാധിക്കും. യേശുവിന്റെ ശിഷ്യന്മാർ അതിനൊരു ദൃഷ്ടാന്തമാണ്. അവർ ക്രിസ്തുവിൽ വസിച്ചപ്പോൾ ആ വാസം പരിശുദ്ധാത്മാവിൽ ആഴത്തിലുള്ള അനു ഭവമായി മാറുകയും അവരെല്ലാവരും ഭൂലോകത്തെ കീഴ്‌മേൽ മറിക്കുന്ന വർ എന്ന പേരിൽ അറിയപ്പെടുന്നതിനും കാരണമായിത്തീർന്നു. അതു കൊണ്ടു നമ്മുടെ ജീവിതങ്ങളെ നവീകരിക്കുന്നതിനും ക്രിസ്തു എന്ന മാതൃകയെ ധരിച്ചുകൊണ്ട് പുതുക്കത്തിന്റെ അനുഭവത്തിൽ ജീവിക്കുന്നതിനും ഈ വർഷത്തെ ചിന്തകളും പഠനങ്ങളും ഏവർക്കും സഹായമാകേണ്ടതിനായി പ്രാർത്ഥിക്കുന്നു.

സസ്‌നേഹം,

†റൈറ്റ് റവ ഡോ. മലയില്‍ സാബു കോശി ചെറിയാന്‍

ബിഷപ്പ്

കോട്ടയം
01. 01. 2024